Þá hættir maður að blogga og hugar að vöðlunum. Líklega verður ekki fjárfest í dýrum veiðileyfum, læt veiðikortið duga. Og svo er líka kreppa.
Annars verður maður að komast í lax, svona einn túr, eða silungsveiði með laxavon.

Og meirihluti þjóðarinnar segir að hún sé lík pabba sínum.

..... en pabbi fékk 3 í síðasta veiðitúr vertíðar. Fáir fuglar sáust þetta árið og hef ég  áhyggjur af stofninum.

Ég er að fitubera leðrið á gönguskónum, nú skal farið til rjúpna í þriðja skiptið. Rjúpnaveisla aldanna árlega má ekki frestast annað árið.
Í mörg ár hefur föðurfjölskyldan mín stundað rjúpnaát sem næst þrettándanum, en á tímum friðunnar og lélegra aflabragða hefur komið fyrir að hormónahænsn sé á boðstólnum, þ.e. kalkúnn. Þrátt fyrir ágætt bragð af kvikindinu þá fylgir hverjum munnbita ákveðinn biturleiki, amk í munni veiðimannsins. Bragð mistaka og getuleysis þess að ná ekki að fæða fjölskylduna.

 

Ég nánast skammaðist mín að skjóta þær fáu hænur sem ég sá um helgina.En þar sem lungun loguðu og sárir fæturnir sviðu undan svitanum var ekki annað hægt en að lita fagurhvít klæði hænsnanna með rauðu. Aðeins fjögur kvikindi voru drepin á þremur dögum, að auki drap pabbi tvær, allt rennur þetta í sama sjóðinn. Halla kvartaði undan vondri lykt af mér eftir þriðja daginn, samt fór ég bað, en það tók ekki að þvo föðurlandið.

Við fengum 14 kvikindi samanlagt víðsvegar um Steingríms- og Þorskafjarðarheiði. Þessar þrjár sem ég drap í misgenginu á Steingrími, meðan mamma sat í bílnum og las Ísfólkið redduðu mínu framlagi. Mikið andskoti var erfitt að hitta í 30m/s og ofankomu í þokkabót.

Ljósin í Laufrima eru birta frá sjónvarpinu, klósettinu og opnum örbylgjuofninum. Halla og Ágústa María vildu vera lengur í faðmi fjalla blárra eftir páska, en sendu mig suður í vinnu.

Hrafnhildur og Siggi Palli eignðuðust skvísu, hraustlega með fallegt höfuðlag.



Senn líður að kosningum og sama hvað kosið er, þá er það Framsóknarflokkurinn sem ræður næstu ríkisstjórn. Verður Framsókn nógu smá til að halda í horfinu eða nógu agnarsmá til þess að mynda 3 flokka stjórn með VG og Samfylkingu ?

Frjálslyndir virðast ekkert erindi eiga með öðrum flokkum.

Tíminn líður hratt, dóttir mín er orðin rúmlega vikugömul. Hún dafnar vel, er svipsterk og fögur, neytir móðurmjólkur af áfergju og hægðir eftir því. Ef tíminn flýgur áfram eins og mér virðist nú, er stutt í koppinn, gelgjuna  og bólugrafna unglisstráka á biðilsbuxunum úti á stétt. (Og þar skulu þeir vera næstu 20 árin amk)

Þegar hún sefur í fangi mínu, friðsæl, ljúf og sakleysið algert er mér nokkuð ljóst að það eru góðar líkur á að hún verði of dekruð og –vernduð af pabba sínum. Hvað er of eða van í þeim efnum?

Klukkan tíu mínútur yfir ellefu, 19 febrúar 2007. Það er ekki hægt að lýsa þessu með orðum, reyni það ekki.  

En ég setti tengil á prinsessuna og er búinn að klaufa inn nokkrum myndum frá merkisdeginum.

Yndislegt.  

Og Lísa líka